Bhiwandi : भिवंडीत गेम पलटणार? भाजपला मोठा धक्का; 10 नगरसेवक काँग्रेससोबत जाणार? Bhiwandi Political Crisis
Bhiwandi Municipal Corporation information : भिवंडी महानगरपालिकेतत भाजपला मोठा धक्का बसला आहे. महापौर निवडणुकीच्या आधीच पक्षाला खिंडार पडलंय. भाजपच्या 22 पैकी 10 नगरसेवकांनी बंडाचं निशाण फडकवत काँग्रेसची वाट धरलीय. सूत्रांनी ही माहिती दिलीय. १० नगरसेवकांचा हा गट थोड्याच वेळात मुंबईतील ‘टिळक भवन’ इथं काँग्रेस प्रदेशाध्यक्ष हर्षवर्धन सपकाळ यांची भेट घेणारे आहे. या भेटीनंतर अधिकृत पक्षप्रवेश होण्याची दाट शक्यता आहे. भाजपचा गड मानल्या जाणाऱ्या भिवंडीत आता काँग्रेसची ताकद वाढण्याची शक्यता वर्तवली जात आहे. भाजपसाठी मोठा राजकीय हादरा मानला जातोय.
महापौर-उपमहापौर कोण होणार ?
भिवंडी महापालिका महापौरपदाच्या निवडणुकीत वेगवेगळ्या धक्कादायक घडामोडी घडत आहेत. कोणत्याच पक्षाला बहुमत नसताना काँग्रेस व राष्ट्रवादी काँग्रेस (श.प.) पक्षाने स्थापन केलेल्या ‘सेक्युलर फ्रंट’मध्ये भाजपचे बंडखोर नारायण चौधरी सहभागी होत असल्याचे बुधवारी सायंकाळी जाहीर करण्यात आले. त्यापाठोपाठ घडलेल्या मोठ्या राजकीय घडामोडींनंतर, काँग्रेस पक्षाने आपले महापौरपदाचे उमेदवार म्हणून नारायण चौधरी यांचे नाव जाहीर केले आहे.
काँग्रेस प्रदेश उपाध्यक्ष गणेश पाटील यांनी भिवंडी पालिकेत महापौरपदासाठी काँग्रेसचे उमेदवार म्हणून नारायण चौधरी, तर उपमहापौरपदाचे उमेदवार म्हणून तारीक मोमीन यांच्या नावांची घोषणा केली आहे. तसेच, त्यांच्या नावे सर्व नगरसेवकांना पक्षादेश (व्हीप) बजावण्याचे आदेश दिले आहेत. या निर्णयामुळे राजकीय वर्तुळात मोठी खळबळ उडाली आहे. दुसरीकडे, भाजपमधील एक नाराज गट सुमित पाटील व नीलेश चौधरी यांच्या नेतृत्वाखाली मुंबई येथे शिवसेना मुख्य नेते तथा मुख्यमंत्री एकनाथ शिंदे यांच्या भेटीला गेला आहे. या भेटीनंतर गुरुवारी दिवसभरात कोणत्या नवीन राजकीय घडामोडी घडतात, हे पाहणे महत्त्वाचे ठरणार आहे.
