केंद्रीय युवक कल्याण व खेल मंत्रालयाच्या राज्यमंत्री रक्षा खडसे यांनी पुण्यात पत्रकारांशी बोलताना सांगितले की, ‘माय भारत’ ॲपवर सव्वा दोन कोटींहून अधिक तरुणांची नोंदणी झाली आहे. भविष्यात युवकांसाठी अनेक चांगले उपक्रम सुरू करण्यात येणार असून, त्यासाठी योजनाही तयार करण्यात आल्या आहेत. पुणे श्रमिक पत्रकार संघाच्या वतीने आयोजित वार्तालाप कार्यक्रमात त्या बोलत होत्या. या ॲपअंतर्गत राज्यात जास्तीत जास्त कार्यक्रम घेतले जाणार आहेत. तसेच, सीएसआर (CSR) च्या माध्यमातून खेळाडूंना मदत केली जाईल, अशी ग्वाही त्यांनी दिली. खडसे यांनी सांगितले की, काही वर्षांपूर्वी युवक कल्याण आणि क्रीडा विभागाकडे दुर्लक्ष केले जात होते. मात्र, गेल्या काही वर्षांत ‘विकसित भारत’ उपक्रमांतर्गत अनेक चांगल्या योजना सुरू करण्यात आल्या आहेत. पंतप्रधान नरेंद्र मोदी यांनी स्वतः यावर विशेष लक्ष देऊन योजना सुरू केल्या आहेत. खेळाची संस्कृती वाढावी यासाठी प्रयत्न सुरू आहेत आणि त्यासाठी खाजगी कंपन्यांची मदत घेतली जात आहे. प्रत्येक राज्याकडे एका खेळाची जबाबदारी देण्यात आली आहे, ज्यामुळे खेळाला करिअर म्हणून पाहण्यास सुरुवात झाली आहे. आता खेळाला करिअर म्हणून घोषित करताना अनेक खाजगी कंपन्यांची मदत घेतली जाणार असून, त्यातून स्पोर्ट्स टूरिझम (Sports Tourism) तयार करण्याचे प्रयत्न सुरू आहेत. शिक्षणाबरोबर खेळातील मोठे बदल सर्वांसमोर येणार असून, त्यातून एक वेगळी संस्कृती निर्माण केली जाईल. पुण्यात नुकत्याच पार पडलेल्या सायकल स्पर्धेच्या निमित्ताने सायकलबाबत नव्याने जनजागृती झाली आहे, ज्यामुळे पुणे पुन्हा सायकलचे शहर होण्यास मदत होईल, असेही त्यांनी नमूद केले.
'माय भारत ॲप'वर सव्वा दोन कोटी तरुणांची नोंदणी पूर्ण:युवकांच्या भविष्यासाठी योजनाही तयार, केंद्रीय क्रीडा राज्यमंत्री रक्षा खडसे यांची माहिती
