बनावट रेशन कार्ड तयार करून शासनाच्या विविध लोककल्याणकारी योजनांचा बेकायदेशीर लाभ घेणाऱ्या एका टोळीचा पर्दाफाश करण्यात मुंबईतील दिंडोशी पोलिसांना मोठे यश आले आहे. या धडक कारवाईत पोलिसांनी एकूण 7 आरोपींना अटक केली असून, त्यांच्याकडून तब्बल 350 बनावट रेशन कार्ड जप्त करण्यात आली आहेत. गेल्या अनेक दिवसांपासून ही टोळी बनावट कागदपत्रांच्या आधारे सरकारी योजना लाटून प्रशासनाची फसवणूक करत होती. अखेर गोपनीय माहितीच्या आधारे पोलिसांनी या रॅकेटचा छडा लावत ही मोठी कारवाई केली आहे. मुंबईतील दिंडोशी पोलिसांनी बनावट शिधापत्रिका (रेशन कार्ड) तयार करून सरकारी तिजोरीची आणि योजनांची फसवणूक करणाऱ्या एका मोठ्या टोळीचा पर्दाफाश केला आहे. या कारवाईत पोलिसांनी 7 आरोपींना अटक केली असून त्यांच्याकडून तब्बल 350 बनावट रेशन कार्ड्स जप्त केली आहेत. हे आरोपी या बनावट कागदपत्रांच्या आधारे ‘महात्मा ज्योतिबा फुले जन आरोग्य योजना’ आणि ‘प्रधानमंत्री जन आरोग्य योजने’चा बेकायदेशीर लाभ मिळवून देत होते. धक्कादायक बाब म्हणजे, या बनावट रेशन कार्डचा वापर बांगलादेशी नागरिकांना कागदपत्रे मिळवून देण्यासाठी आणि विविध शासकीय योजनांचा लाभ लाटण्यासाठी केला जात होता. या प्रकरणातील अटकेत असलेले मुख्य आरोपी दयाल, राकेश सिंग, दिनेश कुमार केसारवाडी, एडवर्ड उर्फ सोनू डिसोजा, मनी संकर शर्मा, बिपिन कुमार पांडे आणि वीरू गुप्ता हे नेपाळचे रहिवासी असून ते मुंबईत हे रॅकेट चालवत होते. या टोळीचे धागेदोरे थेट सरकारी कार्यालयापर्यंत पोहोचले असून, रेशन कार्ड कार्यालयातील एका कर्मचाऱ्याचाही यात सहभाग असल्याचे निष्पन्न झाले आहे, ज्याला पोलिसांनी अटक केली आहे. पोलिसांनी केलेल्या छाप्यात 350 बनावट शिधापत्रिकांसह 9 लॅपटॉप, 2 प्रिंटर आणि मोबाईल फोन असा मोठ्या प्रमाणात तांत्रिक मुद्देमाल जप्त करण्यात आला आहे. दिंडोशी पोलिसांनी याप्रकरणी गुन्हा क्र. 19/2026 अंतर्गत गुन्हा दाखल केला असून पुढील तपास अत्यंत गांभीर्याने सुरू आहे. ही टोळी केवळ आरोग्य योजनांपुरती मर्यादित होती की त्यांनी या बनावट कार्ड्सचा वापर करून इतर काही देशविघातक कृत्य किंवा मोठ्या आर्थिक घोटाळ्यांना मदत केली आहे, याचा शोध पोलिस घेत आहेत. तसेच, मुंबई शहरात आतापर्यंत किती लोकांना अशा बनावट शिधापत्रिका विकल्या गेल्या आहेत आणि या टोळीत अजून कोणा बड्या व्यक्तीचा हात आहे का, याचा तपास सध्या सुरू आहे.
बनावट राशन कार्ड बनवणारी टोळी गाजाआड:दिंडोशी पोलिसांची मोठी कारवाई, 350 शिधा पत्रिका जप्त; 7 आरोपींना अटक
